هه‌واڵ و چالاكییه‌كان ⮜ ئاگادارییەک بۆ ئەو کوردانەی لە فەڕەنسا خوێندنی باڵایان تەواو کردووە

بڵاو کراوە لە: چوارشەممە ٢٣ كانوونی یه‌كه‌م ٢٠٢٠ - ٢٠:٥٢

 

 

نوێنەرایەتی حکومەتی هەرێمی کوردستان لە پاریس پڕۆژەیەک دەخاتە ڕوو بۆ ئەو کوردانەی لە فەرەنسا بڕوانامەی ماستەر و دکتۆرایان بەدەست هێناوە.

 

بۆ دروست کردنی پەیوەندی و گۆرینەوەی زانستی و بەرز راگرتنی خوێندن و بەرهەمی لێکۆڵینەوەی ئەو کوردانەی لە فەرەنسا خوێندنی باڵایان بەدەست هێناوە، نوێنەرایەتی حکومەتی ھەرێمی کوردستان لە فەرەنسا پرۆژەیەک بۆ ئەو توێژەرانەی کە لە فەرەنسا خوێندنیان تەواو کردووە ئەنجام دەدات. ئەویش بە زیادکردنی بەشێک(کاتیگۆرییەک) لە نێو سایتی نوێنەرایەتی حکومەتی هەرێمی کوردستان بۆ کارو چالاکی و لێکۆڵینەوەکانی خوێندکاران هەتاوەکو ببێتە بانکێکی زانیاری بۆ سودی گشتی و تایبەتی. 

 

ئامانجی ئێمە دروستکردنی نێوەندێکە لە نێوان فێرکار و خوێندکارە نوێیەکان و خوێندکارە سەرکەوتووەکان وە هەر خوازیارێکی تر زانیاری  پێویستی بووێت لەسەر ئەو پسپۆڕییەی هەر یەک لەو کوردانەی خوێندنی باڵایان خوێندووە. لە لایەکی ترەوە ئەم سایتە دەبێتە سەرچاوەیەک بۆ بڵاوکردنەوەی پڕۆژە و لێکۆڵینەوەکان کە سودی بۆ خودی توێژەرەکە دەبێت چونکە توێژینەوەکان لە سایتێکی فەرمی باوەڕپێکراوی حکومی بڵاو دەکرێتەوە.

توێژەران دەتوانن بە زمانەکانی کوردی و فەرەنسی لێکۆڵینەوە و توێژینەوەکان بنێرن بۆمان هەتاوەکو لە بەشە فەرەنسی و کوردیەکە بڵاوی بکەینەوە. 

 

داڕشتەی بەشەکە بە پێی پسپۆڕی و بابەتی لێکۆڵینەوەکان دەبێت وە لە هەر پسپۆڕیەکدا ناو و پڕۆفایلی هەریەک لە توێژەرەکان دادەنرێت لەگەڵ کار و کارنامە و بڵاوکراوە نوێیەکانی توێژەران.

 

ئەو توێژەرانەی خوازیارن بەشداربن دەتوانن ئەم داواکارییانەی لای خوارەوە بنێرن بۆمان لەرێگەی ئیمەیڵەوە:

- سیڤی یان بایۆگرافی 

 -کورتەیەک لەسەر پڕۆژە و کارنامە 

- کارنامە بە فایلی پی دی ئێف 

- هەر بڵاوکراوەیەکی تر لەسەر پڕۆژەو توێژینەوەکان کرابێت

 -  بۆ هونەرمەندان و سینەماکاران کار و پڕۆژە پراکتیکیەکان یان لینکی کارەکان ئەگەر لە وێبسایتی کەسی یان هەر شوێنێکی دی بڵاو کراونەتەوە بنێرن

 

دەتوانن پێشنیار و داواکاری خۆتان بنێرن بۆمان دەربارەی ئەم پڕۆژەیە یان هەر پڕۆژەیەکی دی.

 

بۆ پەیوەندی کردن :

secretary.fr@gov.krd

communication.fr@gov.krd 

 

Share

سەرجەم مافەکان پارێزراون بۆ ماڵپەری © حکومەتی هەرێمی كوردستان - 2021' - Agence Web