مێزگەردێکی زانستی سەبارەت بە هەرێمی کوردستانی عێراق لە زانکۆی زانستە سیاسیەکان (Sceinces Po)

ڕۆژی ٩ی نیسانی ٢٠٢٦ – نوێنەرایەتی حکومەتی هەرێمی کوردستان لە فەڕەنسا بەشداری لە مێزگەردێکی زانستی کرد کە لە زانکۆی زانستە سیاسیەکان (Sceinces Po)ی پاریس رێکخرابوو سەبارەت بە پرسی کورد و داهاتووی هەڕێمی کوردستانی عێراق. 

مێزگەردەکە لە لایەن ڕێکخراوی زانستە سیاسیەکانی جیهانی عەرەبی (Sciences Po Monde Arabe) ڕێکخرابوو و توانی ژمارەیەک لە پسپۆڕان، خوێندکاران و چالاکوانانی بواری ڕۆژهەڵاتی ناوەڕاست بۆ گفتوگۆکردن لەسەر ئەو پرسە کۆبکاتەوە.

علی دۆڵەمەری، نوێنەری حکومەتی هەرێمی کوردستان لە فەرەنسا، لەگەڵ هەریەکە لە عادل باخەوان، نوسەر و توێژەر و ئیریس لامبێرت، رۆژنامەنووس بەشدارییان لەو مێزگەردەداکرد بۆ شیکردنەوەی پرسە هەنووکەییەکانی هەرێمی کوردستان.

چەندین تەوەری گرنگ لە لایەن ڕێکخەرانەوە خرانە ڕوو، لەوانە: شێوازی حوکمڕانی لە هەرێمی کوردستان، پەیوەندییەکانی لەگەڵ حکومەتی فیدراڵیی عێراق و پارچەکانی تری کوردستان و ئەو گۆڕانکاری و ئاستەنگ و دەرفەتانەی کە لە دەرئەنجامی کێشە ناوچەییەکانی ئەو دواییە هاتونەتە پێشەوە.

نوێنەری حکومەتی هەرێم تیشکی خستە سەر ڕۆڵی ستراتیژیی هەرێمی کوردستان لە سەقامگیریی ناوچەکە و هەوڵەکانی دامەزراوەکانی هەرێم بۆ چەسپاندنی مۆدێلێکی حوکمڕانی لەسەر بنەمای پێکەوەژیان، هەماهەنگی و کرانەوەی نێودەوڵەتی.

مێزگەردەکە دەرفەتێک بوو بۆ ئاڵوگۆڕی بیروڕا و نیشاندەری بایەخی زیاتری ناوەندە ئەکادیمییەکان و ڕای گشتیی فەرەنسایە بەرامبەر بە پرسی کورد و گەشەسەندنی سیاسی و دامەزراوەیی لە هەرێمی کوردستان.